當另一半有咗B.. 男人通常驚乜?

Posted on July 20, 2014 By       4,061

對於另一半有B,有啲男人會開心到訓唔著,亦有啲男人會驚到謄謄震。其實佢地驚啲咩?佢地驚嘅野又可以點解決呢?

 

我俾到啲乜野老婆仔女?

「二人世界,而且兩公婆都出嚟做野,其實真係冇乜壓力。但係到有咗BB,好多時老婆就要放棄份工係屋企湊B,再唔係就要花一筆錢請人湊,經濟壓力即時倍增!」

 

唔好咁愁住,首先要俾心機做好你份工先。有時間同老婆寫個清單,睇下屋企嘅收入同支出去咗邊,你可能就會發現原來屋企用咗好多錢係啲唔等洗野度。有咗B就一定要犧牲下,你買少個模型,老婆又買少個袋,啲錢就係咁樣草返嚟。再者,而家網路發達,不妨考慮下一啲可以在家工作嘅兼職,可以睇住啊B,又可幫補家計。

 

我以後冇得玩啦……

「有咗啊B之後嘅生活一定會唔同哂!放工就要返屋企接棒湊啊B,再冇得隨時隨地同班Friend睇波吹水……」

 

其實好多男人都將湊B生活諗得太恐怖。唔好只係諗住要幫佢換片、沖涼,BB仲會為你帶黎好多歡笑,佢會無啦啦過黎鍚你、攬你,父母果一刻嘅感動係無價嘅。另外,其實除咗你之外,老婆一樣想見朋友。兩公婆要有商有量,女嘅要放個男嘅去踢波,男嘅亦要俾老婆去High個Tea。記住,平衡嘅婚姻生活先會維持得久架!

 

老婆生B嗌到劏豬咁…..我咩都幫唔到手!

「想像唔到陪老婆入產房既景象。成枱都係較剪,似宰房多過似產房;醫生謢士密密斟,我就一頭冒水!」

 

放鬆啲先,並唔係每個BB出世都好似拍電影咁緊張嘅。唔好覺得自己咩都做唔到,其實老婆呢一刻最需要就係你係身邊嘅支持。醫生謢士都各有各忙,唯一係你可以安撫老婆仔嘅心靈。老婆想要咩都要滿足佢,要咬就俾佢咬,要揻就俾佢揻!

 

有咗BB……我同老婆會冇之前咁close?

「陀B果陣老婆好似都冇乜意欲同我曳曳嘅..」

 

大家都知道係陀B期間,女人嘅性慾係時高時低嘅。原來可能係荷爾蒙、唔夠訓、成日想嘔或者個肚越黎越大!但放心,呢啲日子係會過嘅!要識得捉老婆最有活力嘅時刻,同佢拍下拖、散下步,唔好提BB等佢暫時抽離一下。當BB出咗世之後,都要搵機會同老婆二人世界。就算出唔到街,都可以攬住老婆係屋企睇戲,浪漫一下!

 

每個人都有自己嘅生活模式,但既然選擇組織家庭就要互相遷就。爹哋媽咪加油!

 

資料來源:

http://www.thebabycorner.com/page/2912/

 

莎拉
Work hard, play harder!