親子廚房:小小豬牌士多啤梨雪糕

Posted on July 16, 2014 By       5,745

20140716a

原本計劃咗一連串活動趁假期同小小豬去玩,但小小豬突然發燒,所以咩節目都無晒,乖乖留喺屋企休息啦!其實小小豬除咗發燒之外,其他一切都係好正常,某程度仲精神過我,所以就同小小豬嚟個親子廚房,一齊整雪糕啦!

 

其實上次整肥媽整版Tiramisu雪糕(請按此),小小豬見到都好想食,不過因為有咖啡關係,所以有得睇就無得食。

 

今次我買好哂材料返屋企時,又撞啱小小豬發燒,所以一樣都係唔食得。不過唔緊要,其實親子廚房最主要都係享受整嘅過程嘛!

20140716b

 

今次我係整士多啤梨味雪糕, 最重要就係要將啲士多啤梨切粒粒啦!

20140716c

雖然刀好似係一件比較危險嘅工具,不過我見小小豬都已經開始大個,之前都曾經用過啲外賣膠刀試過切腸仔,我見佢都可以做得到,所以今次我都有放手俾小小豬幫手切啲士多啤梨粒粒。當然,小小豬都係負責切開幾粒,要做到好細細粒就一定係我執手尾啦。

 

倒好啲淡忌廉先。

20140716e

 

然彼用打蛋器將淡忌廉打至六成起泡,個傻豬仔全程都要自己拎住個打蛋器,就算唔夠力都要自己拎,真係俾佢笑C呀!

20140716f

 

加入少少煉奶。

20140716g

 

再加少少士多啤梨香油。

20140716h

 

將啲士多啤梨粒粒拌勻。

20140716i

 

倒入容器內。

20140716j

 

個傻仔話仲有少少士多啤梨粒粒,話唔好浪費要倒埋入盒呀。

20140716k

 

最後放入冰箱雪三小時至硬身就食得啦!

20140716l

 

哈哈哈,小小豬主理嘅士多啤梨雪糕完成啦,我當然係等佢瞓左覺先有得食啦!不過同上次一樣面頭好多泡泡唔太靚添,真係要留意吓依個問題,等我下次可以整得靚啲呀!

20140716m

啖啖雪糕加士多啤梨,口感都唔錯呀!

 

加咗啲新鮮士多啤梨又真係好食好多,當然另一個原因係小小豬整 (雖然我都有份幫手,不過絕大部分都係小小豬做,所以我我都已經當係小小豬整畀我食),所以食落特別甜啲添呀!

 

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。